Anti de Kumsada

Prulugu

"N na nega bedju (...)
Kurpu bo ta ntera i ka nada"
Zé Carlos

Nbin son pa fala bos mantenha si bo na seta. Na armondadi ku djidiundadi, paki, na ora di brinkadera bardadi i ka malgueta. Na ora di brinkadera bardadi ma' mortu. Brinkadera keia na ora di brinkadera... son asin ku no pudi ndjita padiru di no kasa ku npena....No toka dondon no kanta kasabi di ontordia nos lungha ta obinu pa kontentamenti tchentchidu ma moransa-garandi anti di sol na bin pidi simola...pa garan di garasa di dia-nobu pinga na udju nosenti de prentchentches ki tadjadera di no sunhu ndesan.

Suma ki sedu dja sin n ka pudi tadja seu ku mon pa kila n fasi djitu pa sai na koba di timba paki ami i lubu-ku-kema-kosta...Bo tokan lata ka bo medi bo pupan pa rikitin bo tchikinin tambi si garasa ten djidji paki nha nomi - Ndongle Akudeta - asin ki fitu: pa ramenda noti na tudu si maranha anti di mandurgada kanta po na ribada. Tementi nha lamparan ka moku nharasikidas kana okala na moransa ku djamburere na saradu i...nin manhoka ka na fala mal di si sombra tras di lakakon... N misti bai durmi ma sonu tesunti si po di kurpu faran
Ofis di pueta alma na bua na bentu totis na turbuseru Sol sintinela na baranda kampada di sunhu na pabidu pa flur di tautau soronda.

N ka misti panga nha foli nes linha paki li ki ka faradia di pueta. paki nha nhanheru rafilon dimas - na bantaba di lutu la ta misti midi kaparu... te bisilon ta mpasmal ora ki na nkanta palmera badjuda ku tufuli kabelu pa bai kamadia di urbadju... korson di burbuleta ta sangra di tchaskiadura di un amor nobu na mis di Maiu.

Ndongle Akudeta