Vida i nhatidura

djamba
karga don
na tchur di burbuleta

jangada
mbosanta flema
na kambansa di lunghada

na gan-djugude panela di tchur firia iam
tripa di lubu so bosta
pitu di baka dja i ka afuam

no na rabola na reia
pa fika boka
na gan-djambatutu

timba mandji si korson na fidida
purku spinha nega ku si po di tufuli
galinha di matu benhenhi boka
aos nogos ka ten kabelu djurdjuri

kal dia ku santchu
fala malaka mantenha
si ka na dusgustu di kasisa

parentasku di djamba
ku burbuleta
i ta migu di sedu
na bariga di djamburera

no na karmusa ku don
di mandurgada
ruba di bumbulum

djambadon
na kumbu di polon

n mapi lankon di djagra
n na tchalasia ku korson
mandinti
na bantaba di nha sufrimenti

ma vida i nhatidura
nha korson kinguiti
dur

13:15
16.12.06
Ndongle Akudeta