Pasens

Kada ora k' n djubi na spidju di nha konko
flur di marakuja ta rebentan na pitu kur di jaka
estin ku ngarba banui di po-di-kurpu ku nha kama di tchon
turbuseru lan di polon i tustumunhu di nha nsonia

Korson ta flura na djitu di ngorau dimas
diabus ta fika e na kubisan kampada di kerensa
ten pasensa N finkau djudju Dan un kuku di pas
pa n paranta nes lugar ku serenu ta regua ku larma di bela

N labrau dja ku tudu djitu di labradur na blanha di barela
na topitu di mar o na manta di papel branku di mprensa
antu di galu kanta n ta rasa na bu kanternu pa furuta di rasa konkanhi
pa oki sol na bin pidi simola pa i garsidi bu djindjirba di pe di ankol

Ai bu pe rais ku ta da palmiti N ta fasil kola pa iabri nha apititi
ndjata tchuba tambi Pa flur murtcha na nha pitu Nos korson ta firia

Nos korson mandinti ta kai na un sonu manenti di djoto Ten pasensa