Gasadju di nghanhima*

Na noti kumbosus di nha sunhu
gatu pretu dan kontrada
na ora di kanta po na matu malgos
Kikia pupan oredja
ma n ka fia si kontra
bonitasku di nha floresta
ku dispi si kapoti

gritu malgos di linfanti na rosna di lundju
na ianda-kabás di tchon pa seu
ku burmedjusi udju uak
kuma tchon tornal ngratu

tchuba disdangu tuada di tchintchor
flur ndosanta kara ku larma na rostu
palmeras – buli intchi di sangui
ai… kasabi di nha pubis!

lastru di piskabalu
simpatia di montiadur ku purku-di-matu
santchu na kuri sin rabu
ku mon na kabesa pa buska gasadju
mantanha di fugu falal mantenha

mandjuandadi di fugu ku iran-segu
tchintchin di kanfanhotu na lala-kema
(na) baifas di limaria pa mar
tataruga na mpinha si kasa

Pastru pirdi aza tchuluk na koba di timba
djundjun di lubu ka ta tudji gasadju di firintamba
mampatas kru na konkanhi bas di kunfentu di malgueta
iunbudura di arus di gan bera na baliadu bas di sol di koresma
badjudesa di pe findidu na ila mandjua ku bedjusa
- tchai di lungha nobu na tera bedju!

N panta na sunhu
pisadelu djunkin po di kurpu
urbadju di dur na ieri-ieri na nha pitu –
korson di nha púbis

*Bissau, 05 de Junho de 1998
Dia Mundial de Ambiente
Ndongle Akudeta