Djugudjugu

udju-bibu di speransa
firkidja di bardadi
djongagu di no tchon
banbaran di sufrimenti
- distinu di nha púbis na bu mon!

kumbu di baguera brabu
gustundera di fonti di pindjiguiti
turpesa di lifanti matchu
na obulun di nubdadi
ku nburgudjanta tchon

djunda-djunda pa ardansa
djumbulimami na gan-kriol
baloberus garandi djuramenta
kuma si kontra i kafumban
- fluris badjuda bo konkanhi
dídia uan des kunfentu!

ma si kontra tambi…
bisianu katchu na mpampam
sombran kaminhu lundju di nha púbis

banoberu di nha djorson
djidiu di lungha nobu
botan banu na bisinhansa
tcholonan kanta-po na santa prasa


Nkinde na Braia
04.09.98